Mən hər zaman deyirəm ki, biznesin stabil gələcəyini təmin etmək üçün yeni məhsullar yaradılmalıdır. Yeri gəlsə məhsulun yenilənməsi üçün yeni xətt almağa ehtiyac da yoxdur. Əsas olan əlinizdəki xəttdə yeni məhsulları yaratmaq ambisiyanızın olmasıdır. Təcrübə onu göstərir ki, bir çox hallarda satışlarda yaranmış qüsurları məhsullarda və ya brendlərdə axtarmırıq. Ya satış komandasında, ya ticarət nöqtəsində, ya fəsildə, ya da müştərilərlə olan münasibətlərimizdə axtarırıq. Aydın məsələdir ki, sadalananların satışlara təsirləri var. Ancaq başqa bir məsələ də vardır ki, onu da unutmayaq. Bu zamanla unudulan məhsullardır.

Sadə bir misal çəkim.

Kinoteatrlar televizorlardan əvvəl yaranmışdır. Ancaq bu sahənin mütəxəssisləri sonradan bu məhsulu televizora çevirdilər və kinoya baxmaq ənənəsini evlərə daşıdılar. Mexanizm eyni olsa da, təklif olunan məhsul fərqli və yeni oldu. Daha sonra isə sevimli filmlərə evdə baxmaq üçün video maqnitafonlar təklif olundu. Yenə də mexanizm eyni, təklif olunan məhsul yeni və fərqli oldu. Bu kəşf istehlakçılara filmlərə daha rahat şəkildə baxmağı təmin etməklə yanaşı, onların həyatında yeni məhsul kateqoriyasını da açmış oldu. Ona görə ki, bu məhsulun ortaya çıxması ilə insanlar uzaq məsafələrə gedib filmlərə baxmaq kimi problemlərini həll etdilər.

Mövcud məhsullarla yeni bazara daxil olmaq, məhsul kateqoriyalarının genişlənməsi və mövcud məhsullar üzərində yeniliklərin aparılması məhsul xəttlərinin genişlənməsidir. Başqa bir formada isə mövcud məhsulları fərqli qablaşmada və dizaynda təqdim etmək isə repozisiyalanmadır.

Marketinq mütəxəsisləri tərəfindən köhnəlmiş məhsulların realizasiyası üçün yeni potensialın verilməsi, məhsul xüsusiyyətlərinə görə fərqli şəkildə istehlak və ya istifadə olunur.

Belə ki, “AVON” şirkəti özünün lasyon məhsulu “Yumşaq dəri” adlı brendini analiz edərkən bu məhsulun başqa və tam yeni potensialını da aşkarladı. Müəyyən etdi ki, istehlakçılar bu lasyondan həm də ağcaqanadlardan qorunmaq üçün istifadə edirlər. Elə buna görə də “AVON” bu brendi ikili təsiri olan məhsul kimi  satmağa başladı.

Elə mən özüm də satışa təklif olunan istənilən məhsulun gizlin potensiallarının olduğuna inanıram. Yetərki məhsullarımızın imkanlarını dərindən öyrənək. Ancaq belə olduğu halda biz marketerlər həm istehlakçılara yeniliklərimizi təklif edə bilərik, həm də müəssisənin gəlirləri artar. Hazırda bir neçə layihə üzərində işlər gedir və yeniliklər müəssisəmizin istehsal imkanları nəzərə alınaraq aparılır. İstehsalatın gücü zəif olsa da istehsal etdiyi məhsulları təkmilləşdirmə imkanlarına sahibdir. Əlbəttə ki, bütün bu hazırlıqlar, bazara yeni və daha təkmil şəkildə məhsulların buraxılması bir aya başa gəlmədi. Bunun üçün sahibkardan tutmuş, anbara qədər bütün imkanlar nəzərdən keçirildi və bütün prosedurlar a-dan z-yə nəzərdən keçirildikdən sonra işlərə başlanıldı.

Nə üçün yeni və təkmilləşmiş məhsulların olmasına ehtiyac yarandı?

Səbəb cari məhsulların uzun müddət, heç bir yeniliklər olmadan bazarda olması və bazar imkanlarından maksimum istifadə olunmamasıdır. Yeniliklərimizin başında duran əsas hədəf isə, təbii ki, ixracatdır. Böhran var və bunu qəbul etməliyik, ancaq bir həqiqət də vardır ki, böhran özü ilə yanaşı fürsətləri də gətirir. Müəssisənin imkanlarından maksimum istifadə etməməsi bizə bundan yararlanmaqla yanaşı, bir çox fürsətləri də verir. Yaranmış fürsət həm də şirkətin gəlirlərini artıracaqdır. Ona görə də yeni və təkmilləşmiş məhsulların və yeni markaların ortaya çıxmasına yönəlik proses gedir. Hədəfimiz həm daxili və həm də xarici bazarlarda daha böyük həcmdə məhsulların satılmasıdır. Siz də istehsalınızın imkanlarını dəyərləndirin və məhsullarınıza yeni nəfəs verin.

Sizin marketinq bələdçiniz…

(116 dəfə baxılıb)