Həftənin 7 cümə günü

0
31

Müştəri tipləri arasında ən maraqlı olan tiplərdən. Bu tip müştərilər üçün həftənin günlərinin bir adı var. O da Cümə günüdür. Bu tipdən olan müştərilər görüşlərin vaxtını tez – tez dəyişirlər. Qarşı tərəf üçün bu tip müştərilər güvənsiz, məsuliyyətsiz, boş fikirli kimi qəbul olunurlar. Əslində bu tip müştərilərin formalaşmasında və müştərilərlə münasibətlərinin bu həddə çatmasında satıcı tərəfin də payı az deyil. Ancaq bir az həftənin yeddi günün tək cümə günü hesab edən müştəri tipi haqqında yazmaq istərdim.  Bəs bu tip müştərilərin tipajını necə müəyyən etmək olar? Müştərilərin çox sadə bir davranış adətləri vardır ki, ona diqqət etməklə onun tipajını müəyyən etmək heç də çətin məsələ deyil. Belə ki, bu tip müştərilər satıcı ilə ilk görüşdən sonrakı mərhələlərdə qarşı tərəflə görüşlərdən yayınırlar. Yaxud da hər dəfəsində müxtəlif səbəblər gətirərək görüşlərin vaxtını ertələyirlər.

Sual: Bəs bu tip müştərilər nə üçün telefon zənglərinə cavab vermirlər və yaxud görüşlərdən yayınırlar?

Səbəblər çoxdur. Əksəriyyəti də satış menecerlərinin öz üzərinə düşür. Sizə mənzərəni təsvir etməyə çalışacam və ümid edirəm ki, hadisə gözünüzün qarşısında canlanacaqdır. Məsələ burasındadır ki, satış menecerlərinin əksəriyyəti müştərilərlə kontakt qurmaq üçün müxtəlif kanallara əl ataraq müəyyən cəhdlər edirlər. Kanallar isə həmişə olduğu kimi  müxtəlif şirkətlərdə çalışan dostlar, yoldaşlar, tanışlar və s. bu kimi müştərinin yanına gedib çıxaran yollardır . Bu bloqpostda qismən də olsa xidmət satan və yaxud müştəri axtarışında olan satış menecerlərinin də görüşlərdən yayınan müştərilərin yetişməsində rollarının danılmaz olduğuna diqqət çəkmək istəyirəm. Yəni ki, bütün problemləri tək müştərilərin üzərinə atmaq doğru deyil. Bu vəziyyətdə başlıca problem odur ki, xidmətlərin satışı ilə məşğul olan satış menecerləri bir çox hallarda müştərilərin ehtiyac və tələblərini müəyyən etmədən müştərilərə aidiyyatı olmayan xidmətləri təqdim edirlər. Başqa bir tərəfdən isə müştərilərə özlərinin belə xəbərləri olmayan təqdimat və materiallar göndərirlər. Hörmətli satış menecerləri, amanın bir günüdür, etməyin! Nə olsun ki, müştəri sizinlə yaxın dostunun, tanışının xatirinə görüşə razı olub? Bəyəm bu sifarişlərə razılıq verilmişdir kimi qəbul olunmalıdır? Xeyr, məncə hörmətli satış menecerləri özləri buraxılan xətaların bir ucunu da özlərində axtarmalıdırlar. Əmin olun ki, sizin dirənişli zəngləriniz heç bir nəticə verməyəcəkdir. Sadəcə olaraq müştərinin görüşlərdən yayınma səbəblərini müştəridə yox, özünüzdə axtarın.

Bəs bu tip müştərilərlə necə işləmək lazımdır?

  • Məhsul və ya xidmətlərin satışlarına (məhsullar haqqında dərin və ətraflı məlumat) tam hazır olmaq.
  • Tanışlıq və ünsiyyət zamanı sadəcə işdən danışmamaq. Vəziyyətə uyğun maraqlı qeyri formal müzakirələrin olması.
  • Ehtiyacların müəyyən edilməsi.
  • Məhsulun və ya xidmətin təqdimatı.
  • Məhsul və xidmətlərə yönəlik verilən sualların cavablandırılması (etirazlara cavab).
  • Müştərinin satınalmaya müsbət qərar verə bilməsinə şəraitin yaradılması.
  • Danışıqlar mərhələsində əldə edilən razılıqları bir bir fiksləmək ( e-mail, yazışmalar, mərhələlərə görə razılaşmalar və s.), müştəridə sual və etirazlar yaranarsa bu bəndi işə salmaq.

Hörmətli dostlar, əslində satışlar zamanı rastlaşdığımız müştəri tiplərinin formalaşmasına səbəb olan amillərdən və məsul şəxslərdən biri də elə özümüzük. Çalışmaq lazımdır ki, hər dəfə görüşlərdən sonra özümüzü monitorinq edək. Əgər bloqpostda yazılanlar sizin də xarakterinizdə vardırsa, ən qısa zamanda ondan uzaqlaşın. Əks halda satışlarınızda və müştərilərinizlə münasibətlərdə lazımsız problemlər qaçılmaz olacaqdır. Sizə uğurlu satış və xidmət arzulayıram!

 

 

(54 dəfə baxılıb)

LEAVE A REPLY

Please enter your comment!
Please enter your name here